USNews Logo

Қовун пашшаси 2000 йилдан бошлаб мамлакатимиз ҳудудида илк бор Қорақалпоғистон Республикаси ва Хоразм вилоятида аниқланди. Бугунги кунда бу зараркунанда барча вилоятларда учраб, личинкаси асосан қовунни ва кам миқдорда тарвуз, ошқовоқларга сезиларли зарар етказмоқда.

Сохта ғумбаги тупроқда қишлайди. Баҳорда қовун гуллаш пайтида пашшалари уча бошлайди. Урғочилари олти-саккиз кундан сўнг мева пўсти остига биттадан тухум қўя бошлайди. Пашшалари икки ойгача яшайди. Битта урғочиси 120тагача тухум қўяди. Тухумдан чиққан личинкалари қовун мағзи ва уруғлари билан озиқланиб, вояга етгандан кейин чиқиб тупроқда ғумбакка кетади. Зарарланган қовунлар чириб кетади. Қовун ҳосилларини 100 фоизгача зарарлаши мумкин.  Йилига икки-уч марта авлод бериб ривожланади.

Қовун пашшасига қарши қарши кураш чоралари:

Агротехник: Далада чириган қовунларни йиғиб олиб йўқотиб (кўмиб) ташлаш; ерни чуқур шудгор қилиш; эртапишар навларни эрта муддатларда экиш (пашша фақат энди пайдо бўлган меваларни зарарлайди, пўсти қотган меваларга тухум қўя олмайди).

Кимёвий кураш чоралари:

1. Қовун дала майдонларида қовунни усув ва гуллаш даврида қуйидагилар тавсия этилади: 

А)  Фуфанон  57% эм.к -0,6-1,2 л/га,           

Б)  БИ-58 40% эм.к -0.5-2.5 л/га,

В)  Каратэ   5% эм.к. -0.5л/га,                     

Г)  Конфидор 20%эм.к- 0.3-0.4л/га,

Д)  Адмирал  10% эм.к -0.5 л/га,                  

Е)  Аваунт 15% сус.к- 0.4 л/га.

Қадрли дехқон, фермер хўжалиги раҳбарлари ва аҳоли томорқаси эгаларидан мўл-кўл, сифатли ҳосил етиштириш учун юқорида кўрсатиб ўтилган карантин зараркунандага қарши агротехник ва кимёвий  курашиб, уларни  ўз вақтида аниқлаб, кўпайишига йўл қуймаслик чораларини кўришингизни сўраймиз. Бу билан Сиз ҳудудингиздаги фитосанитар тозаликни таъминлашга ўз ҳиссангизни қўшган бўласиз.

Абдувоҳид Отахонов,

Наманган вилояти Ўсимликлар карантини давлат инспекцияси инспектори.

© namangan24.uz