USNews Logo

Наманган вилояти ҳокими вазифасини бажарувчи Шавкат Абдураззоқов Президентимиз раислигида шу йил 8 август куни ўтказилган видеоселекторда белгиланган вазифалар ижросини таъминлаш, ҳудудлардаги ўрганишларда берилган топшириқлар қай даражада бажарилаётганлигини кўриш мақсадида янги ташкил этилаётан кичик саноат зоналарига борди.

Шавкат Абдураззоқов ўрганишлар давомида Косонсой туманидаги Гўрмирон ҳудудида 30 гектарлик "Намуна" кичик саноат зонасида иш бошлаётган тадбиркорлар билан учрашди. Бу ерда режага кўра, қиймати 242 миллиард сўмга тенг 43 та лойиҳа бажарилади. Бу эса 1237 кишини иш билан таъминлаш имкониятини беради.

Туман ҳокими Баходир Юсуповнинг қайд этишича, Косонсой вилоят аҳолисининг 8 фоизини ташкил этган ҳолда, саноат маҳсулотларини ишлаб чиқаришда жудаям паст - атиги 3,6 фоиз кўрсаткичга эга. Косонсойликлар сўнгги кунларда бўлаётган ижобий саъй-ҳаракатлардан руҳланиб, янгича ёндашувда иш ташкил этиши даркор. Бунинг учун тумандаги тадбиркорларда улкан салоҳият мужассам.

Бир сўз билан айтганда, Президентимизнинг 2018 йилдаги қарорлари билан Наманган вилоятида кичик саноат зоналарини ташкил этиш, шу орқали тадбиркорликни ривожлантириш ҳамда аҳоли фаровонлигини оширишга алоҳида эътибор қаратилмоқда. Ҳозирга қадар Наманган шаҳрининг ўзида “Орзу”, “Юксалиш”, “Пахталикўл”, “Даштбоғ” каби 6 кичик саноат зонаси ташкил этилиб, уларда 12 минг кишининг бандлиги таъминланди. Куни кеча тамал тошлари қўйилган янги учта саноат ҳудудлари ишга тушгач 12 837 ишчи меҳнатда банд бўлади. Вилоят миқёсида эса кичик саноат зоналари ҳисобига жами 20 минг та реал ишчи ўрни яратилади.

Оқилхон Дадабоев,

"Namangan24.uz" ахборот-таҳлилий портали бош муҳаррири.
Ҳотам Мамадалиев олган суратлар.